#realnoljubav počinje sa tobom

Avatar photo
sa tobom

Znate za kliše “ne može te niko voljeti ako ti ne voliš sebe”. Kada je kliše, onda je i istina. Valjda je najteže voljeti sebe. Voljeti sebe – kao vrhunac ljubavi. Kako da te miluje nečija ruka, ako tvoja nije mogla? Da si ti on da li bi sebe voljela? Ako je odgovor da, onda ništa drugo nije važno. Ljubav počinje sa tobom, kad imaš sebe imaš sve, svoju ruku uvijek možeš da uhvatiš, sebe da zagrliš, šapneš nježne riječi, ili kako kaže Miley “I can buy myself flowers”.

Zašto čekati savršenu priliku, savršenu ljubav, tog čovjeka ili taj jedan dan kada će se sve magično promijeniti. Mnogi će dolaziti i prolaziti, zadržavati se ili trčećim korakom odlaziti, neki će i ostati zauvijek. Ali šta je zauvijek kad ne voliš sebe.

Ljubav je da se čuva, njeguje i zalijeva kao cvijet. A cvijet bez korijena ne ide – taj korijen si ti. Super je imati tu jednu osobu, nekoga za koga istinski znaš da je do srži tvoj, da su tvoje noći njegove i njegova jutra tvoja. A ko si ti, možeš li ti biti njegova ako svoja nisi?

Učili su nas kako voljeti sebe, a nisu nam rekli da se to ne uči. To je ljubav koja leži duboko u nama, prožima se kroz cijelo tijelo. Dijelimo je sa drugima, nekad umnožena, ponekad izigrana, srećna ili tužna, uvijek je tu. Ipak, matematika kaže da kada ništa nemamo, ne možemo ništa ni da dijelimo. Svaki broj sa nulom je nedjeljiv.

Možda te zanima
libido

Zato, izvuci svoju ljubav na površinu, ne dozvoli da se ona guši u dubinama plavog mora, skrećući pogled sa nje, samo da bi vidio kopno. Ti si kapetan u tom moru. Što prije uhvatiš ruku koja traži spas naučićeš o ljepoti života i umijeću ljubavi.

Ne zaboravi, drugi te gledaju kroz tvoje oči, jer realno, ljubav je ono što si ti sebi.

© 2023, sva prava zadržava ZdraviJa magazin.

Povratak na vrh